![](uploads/news/65354cd9529d85.32013337.jpg)
გამარჯობა,
მე ვარ ელენე განაია, მესტიიდან, საოჯახო სასტუმრო „Wooden Huts in Mestia“-ს დამფუძნებელი და მეპატრონე, პროფესიით ეკონომისტი. ჩემი ისტორია 2020 წელს იწყება როდესაც გადავწყვიტე გადმოვსულიყავი მესტიაში, მეყიდა მიწა და საოჯახო სასტუმროს ტიპის ხის ქოხები გამეკეთებინა. იდეა მასშტაბური იყო და საკმაოდ შრომატევადიც, მაგრამ მე ის ადამიანი ვარ ვისაც სირთულეები დამატებით მოტივაციას აძლევს. საწყის ეტაპზე, როდესაც მიმდინარეობდა კოტეჯების სამშენებლო სამუშაოები, მოვიძიე ინტერნეტის მეშვეობით ცნობა პროექტ GRETA-ს შესახებ, რომელიც ევროკავშირის, შვედეთის და ავსტრიის დაფინანსებით ხორციელდებოდა, ფარავდა მაღალმთიან რეგიონებს, მათ შორის სვანეთსაც და მხარს უჭერდა სამთო ტურიზმის განვითარებას. მე თვითონ როგორც ევროკავშირის პროგრამის ყოფილი თანამშრომელი, მეტ-ნაკლებად მქონდა წარმოდგენა იმ ბენეფიტებისა და შესაძლებლობის შესახებ, რომელიც დონორების დახმარებით განხორციელებული პროექტიდან შეიძლებოდა მიმეღო და ამიტომ მონაწილეობა უპირობოდ გადავწყვიტე.
ჩემი მოთხოვნები ადეკვატური აღმოჩნდა, რადგან სამშენებლო ხარჯების უზრუნველყოფა ისედაც მქონდა ჩემს ბიუჯეტში გათვალისწინებული, ამიტომ გრეტას ფარგლებში აქცენტი გავაკეთე კოტეჯების კეთილმოწყობაზე. შესაბამისად დადებითი პასუხი მომივიდა და მივიღე დახმარება, რომელმაც შეიძლება ითქვას ჩვენს რეგიონში ტურიზმის სფეროში არსებული კონკურენციის პირობებში უპირატესობა მომანიჭა. ეს გახლდათ ცენტრალური გათბობის სისტემა, ტექნიკური აღჭურვილობა ჩემს კომპლექსში არსებული საინტერესო სივრცისთვის, რომელიც ტრენინგების და სხვა ღონისძიებების მასპინძლობისთვის მოვაწყვე. უფრო დეტალურად კი ეს იყო საუნდ სისტემა და პროექტორი. ასევე არ უნდა დაგვავიწყდეს ჩატარებული ტრენინგები მარკეტინგისა და კულტურული გიდის სპეციფიკის შესახებ.
შედეგად მივიღე ის, რომ ოთხივე სეზონზე ვმასპინძლობ სტუმრებს, რაც როგორც ზემოთ აღვნიშნე, ნამდვილად არის უპირატესობა, გაიზარდა სტუმრების რაოდენობა და რეალურად მეტად კომფორტული გარემო შეიქმნა. არ მომერიდება და ვიტყვი რომ ეს შეიძლება რეალურ წარმატებად ჩაითვალოს. აქვე ჩემს თავს უფლებას მივცემ ერთი პატარა რჩევა ვუთხრა ადამიანებს, რომლებიც სტუმარ-მასპინძლობის სფეროში არიან: ძალიან მნიშვნელოვანია გათვალისწინებულ იქნას მომხმარებელთან ურთიერთობა, მათთან სწორი კომუნიკაცია, მათი სურვილების მოსმენა და მეგობრული ურთიერთობები არის წარმატების ერთ-ერთი საფუძველი.
გეგმებზეც შემიძლია მოგიყვეთ, რადგან ბევრი იდეა მაქვს. პირველ რიგში ვფიქრობ კოტეჯების რაოდენობა დავამატო, რასაც დამსვენებელთა გაზრდილი რაოდენობა მკარნახობს. აგრეთვე მინდა სხვა ლოკაციაზე გავაკეთო მსგავსი მოდელის კომპლექსი, ოღონდ მოდით ამ ლოკაციას ჯერჯერობით საიდუმლოდ დავტოვებ. აგრეთვე დიდი სურვილი მაქვს იმდენად გავფართოვდე, რომ ბევრი ადგილობრივი ადამიანი დავასაქმო.
ყოველივე ზემოთ ჩამოთვლილის რეალიზებისთვის რა თქმა უნდა საჭიროა ახალი მხარდაჭერისა და დაფინანსებების მოძიება, აქედან გამომდინარე სრულ მზადყოფნაში ვარ ახალი საქმიანი კავშირების დასამყარებლად, ახალ საგრანტო პროგრამებში მონაწილეობის მისაღებად და თანამშრომლობისთვის საკონტაქტოდ ხელმისაწვდომი ვარ განთავსების პლატფორმების, ელ-ფოსტის: elene.ganaia@gmail.com და ფეისბუქ გვერდის “Wooden Huts in Mestia” საშუალებით.
---
ევროკავშირის, შვედეთის და ავსტრიის მხარდაჭერით საქართველოს მაღალმთიან რეგიონში, მცირე და საშუალო მეწარმეები, რომლებმაც მიიღეს მნიშვნელოვანი მხარდაჭერა ბიზნესის განვითარებისთვის, ჯამში 68 მეწარმეს ითვლის.
თვალი ადევნეთ წარმატების შემდეგ ისტორიებს, სადაც საოცრად საინტერესო ხალხი გვიამბობს საკუთარ გამოცდილებებზე.
პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.
ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.
#68წარმატებისისტორია
#ევროკავშირი #შვედეთი #ავსტრია
#პროექტიGRETA #მთისეკონომიკისგანვითარებისთვის